بالنسبه لسوالف ساهر

في الآونه الاخيره صار حديث الناس في المجالس وفي الشوارع وعلى الأرصفه هو ساهر،

حتى أصبح السؤال الدارج اليوم ..

هاه بشر كم عليك من ساهر..؟؟



تروح تسير على أهلك وجماعتك وربعك..

يقولون لك هاه عسى ماصادك ساهر..؟!

تروح تسافر ولما توصل يقولون لك صادك ساهر.؟؟

يعني حتى حمدالله على السلامه مافيه..!



وبالمناسبه..

مابقى الا يقدمون أقتراح في كروت الأفراح والزواجات..

ممنوع اصطحاب جوال الكاميرا للنساء.. وانتبهوا من ساهر....!!! << مدري تدفع عانيه والا تدفع لساهر...!؟







شطحه:

أم تحذر ولدها وتقول له: انتبه وانا أمك من ساهر..؟؟ تراها سربوت دآج<< تحسبه واحد من عيال الحاره ههههههههه



(من خيالي)





وش نقول ووش نخلي من سوالف ساهر..!؟؟؟

وأقرب مثال أخـونا خلوني وماحصل معه...

وعلى شاكله خلوني كثير...





من وجهة نظري ..

أنه النظام ممتاز جداً ومفيد.. عفواً.. عندنا رديء وداج



لكن ربعنا هداهم الله ماعرفوا كيف استخدامه..!؟

علاوةً على موضع ومكان استخدامه...



خذ مثلاً..



في الرياض..

من زحمه لزحمه..

ومن حفريه لحفريه..

ومن دبلة سبد لدبلة سبد..

وحاطين عشرين الف كاميرا....!؟



ليش..؟؟

هل السبب أنه فيه أحد يسرع في خريص مثلاً او غيره..؟!



لا...

ولكن الكاميرات موضوعه في مكان اقرب مايكون بالخسيس.. وبذالك اعني أنه مكان للصيد.. وليس للحد من السرعه كما يزعم خبوله..!؟





خلوهــا على ربـــكم..

مدري ناخذ من رواتبها لساهر.. والا وش نسوي..!؟ على الله..





>> للمعـلوميـه: نظام ساهر لايسجل المخالفات على سيارات أصحاب السمو الملكي...!



وشكراً

Date: Tue, 25 Jan 2011 12:31:33 +0300
Subject: { Group Jadeed } حتى في الثمامه + 21
From: khlooni@gmail.com
To: jadeed@googlegroups.com

بسم الله الرحمن الرحيم

مساكم الله بالخير

اليوم نرجع لسوالف ساهر

***

قبل كم يوم قررت أطلع مع الأهل لمنطقة الثمامه حتى نستمتع بالأجواء الجميله الله يديمها علينا

كنت ماشي في الطريق الدائري وبعد دخولي لمخرج الثمامه تفاجأت بالحبيب ساهر موجود اخر المخرج واخذ لي صوره حلوه وانا مسرع شوي < صدقوني ما تجاوزت 100 كيلو

بعد موقع ساهر توجد لوحة سرعه ومكتوب عليها 90

وبعدها بمية متر مكتوب 80

تمشي مية متر وتتغير لسبعين وتنزل السرعه الى ان تصل الى 30 عند اول دوار

مع العلم ان الشارع يعتبر طريق سريع من بدايته الى قبل الدوار بمية متر تقريباً

الحقيقه تنكدت وصرت اشوف السحاب والمطر كأنه شمس حارقه

يعني من زين الثمامه حتى تنكد علينا ياساهر

تطلع للدوام ويصيدك ساهر نعديها تروح مشوار وترجع بمخالفه اوك مافيه مشكله

لكن تطلع ترفه عن نفسك وترجع متنكد هذي وين نصرفها

خاف الله ياساهر

ياجماعه لو الطرق عندنا حلوه وتوسع الصدر كان مشينا بهدوء لكن كلها غبره ومافيه ارصفه ولا تشجير وشوارع مسافاتها طويله وتلومونا اذا اسرعنا

انا اتكلم عن السرعه المعقوله لكن ساهر الله لا يوفق القائمين عليه حاطين سرعات منخفضه جداً

يعني عشان تروح مشوار مدته الطبيعيه نص ساعه صار لازم تطلع قبل الوقت بساعه إكراماً لعيون ساهر وسرعاته السخيفه

عن نفسي صرت اتعامل مع مخالفات ساهر بشكل شبه اسبوعي

شي يقهر وحسبي الله ونعم الوكيل

اشوف فيك يوم ياساهر

***

ما يستفاد من السالفه

1- انطق في بيتك احسن لك
2- اذا عندك ظرف طارئ خذ ليموزين
3- +21 مالها دخل
4- دبابات البانشي في الثمامه مراتبها مشققه
5- مطعم هرفي الثمامه زحمه ولا يفتحون بسرعه بعد الصلاة
6- لا تشترون عبري من الثمامه ترى طعمه مر
7- وسط الاسبوع مافيه احد يطعس في خزام