المعذره لو مسكنك في العين مش من مستواك

إن كنت ماحبك ولاعزّك ولا لي نفس فيك=فاجوك قل لي ليش عيني وين ما شافت تراك
وليش عقلي ماجعل لك في خيالاته شريك=وليش رغم إنك بشر دايم أحس انك ملاك
الصدق انا أهواك وأهوى من هواك أمك وابيك=واعشق دروبك لو دروبك مابها غير الهلاك
واكذب إذا قلت ان ما ودّي أضمك واحتويك=أو ما حلمت اصبح ولو بسمه تعانقها شفاك
أحب من دنياي لحظة ما تجيني أو أجيك=وأكره جميع أوقاتي اللي كنت عايشها بلاك
وابيع عمري وادفع أغلى ما لدي لجل اشتريك=واموت قبل أنساك أو ينقص بميزاني غلاك
واحمل بدل عنّك همومك والأسى اللي يعتريك=وامنح نصيبي لك من الفرحه واحقق لك مناك
إن كان قلبي للمشاعر مملكه فانت المليك=وان كان عمري تاج والله ماأتوّج به سواك
دوّر علي في عالمك تلقاني أول من يليك=وابحث علي تلقاني الظل الذي يمشي وراك
واسكن بعيني حيث ما مخلوق فيها يعتليك=والمعذره لو مسكنك في العين مش من مستواك